„Ég var fluttur á bráðamóttökuna af úrvalspiltum og hér er ég í góðum höndum,“ skrifaði Hrafn Jökulsson á Facebook síðu sína nú í morgun. Gaf hann Mannlífi góðfúslega leyfi fyrir því að vitna í færsluna. Hrafn hefur verið töluvert í fjölmiðlum undanfarið eftir að hafa krafist 120 milljóna króna frá íslenska ríkinu vegna bæði læknamistaka og handtöku. Málin sem um ræðir eru tvö og verða þau þingfest þann 8. September í Héraðsdómi Reykjavíkur.
Hrafn, sem greindur er með krabbamein, telur hann að læknamistök hafi orðið þegar hann lá á spítala í mars vegna særinda í hálsi. Reyndust særindin vera krabbameinsæxli sem uppgötvaðist þó nokkrum mánuðum síðar, eða í júlí. Var Hrafni tjáð við greiningu að hann ætti að öllum líkindum örfáar vikur eftir ólifaðar. Telur hann að ef æxlið hefði uppgötvast fyrr hefði verið hægt að fjarlægja það og um leið stórbæta lífslíkur hans. Heilsu Hrafns virðist nú hafa hrakað hratt en þrátt fyrir það er hann jákvæður og tekst á við þau verkefni sem blasa við.
„Nú er farið að hitna í kolunum. Surtla er ófyrirleitin og hefur tekið málaliða í þjónustu sína,“ skrifaði Hrafn í morgun og birti mynd af sér á spítalanum. Hann segir þá markmiðið vera að klára geisla dagsins en rannsóknir gætu þó tafið næsta dans. „LAG DAGSINS: Ég veit þú kemur í kvöld til mín. FRAM TIL SIGURS – MEÐ GLEÐINA AÐ LEIÐARLJÓSI,“ skrifar Hrafn að lokum.