Wiktor Tomasz W. Tómasson hefur verið dæmdur í tveggja ára fangelsi fyrir kynferðislega áreitni og nauðgun. Var ungur aldur Wiktors metið til refsilækkunar sem og að dregist hefur að taka mál hans fyrir hjá dómstólum. Wiktor var dæmdur í héraðsdómi Austurlands í nóvember 2019. Wiktor framdi kynferðisofbeldið í nóvember 2017. Wiktor Tomasz var þá 18 ára. Hann áfrýjaði dómnum og var það ekki fyrr en á þessu ári sem málið var tekið fyrir hjá Landsrétti.
Wiktor var ákærður í tveimur liðum. Hann var dæmdur fyrir kynferðislega áreitni með því að fara inn í herbergi til ungrar konu þar sem hún svaf. Sakaði konan Wiktor um að hafa sleikt og sogið á henni aðra geirvörtuna. Þegar unga konan vaknaði yfirgaf Wiktor herbergið.
Wiktor kom aftur inn í herbergið þegar konan hafði sofnað á ný. Þar lagðist hann upp í rúm hjá konunni og nauðgaði henni. Í dómnum segir að konan hafi ekki getað varist ofbeldismanninum sökum svefndrunga og ölvunar. Wiktor og konan þekktust í raun ekkert á þessum tíma.
Í dómnum kemur fram að eftir lokun skemmtistaðar fór Wiktor Tomasz að heimili sínu. Þar bjó þolandinn ásamt dóttur sinni. Fleiri bættust í hópinn og varði samkvæmið í allnokkurn tíma. Konan sem var þolandi í málinu lagðist til svefns en Wiktor var á neðri hæð hússins ásamt ungum manni. Þar kastaðist í kekki á milli þeirra og endaði rifrildið með því að Wiktor sló í átt að unga manninum sem kjálkabrotnaði. Lögregla og sjúkraliðar voru kölluð á vettvang kl: 08:14 og var pilturinn fluttur á heilsugæslustöð og þaðan með sjúkraflugi á Landspítalann.
Lögregla ræddi við Wiktor Tomasz á vettvangi en hann var ekki handtekinn. Í gögnum segir frá því að á þeirri stundu hafi ákærði verið „rólegur, en sjáanlega ölvaður. Hann var stöðugur í göngulagi og hreyfingum og skýr í talanda.“
Lögregla gerði sér aftur ferð í húsið kl: 09:28 til að ljósmyndavettvanginn vegna líkamsárásarinnar. Eftir að lögregla yfirgaf svæðið beitti Wiktor Thomasz stúlkuna kynferðisofbeldi. Konan kærði og þegar lögregla óskaði eftir að Wiktor gæfi sýni til lífsýnarannsóknar, neitaði hann og varð að beita dómsúrskurði til að hægt væri að bera saman lífsýni sem fundust í rúmlaki brotaþola á ætluðum brotavettvangi.
Unga konan fékk sálfræðiaðstoð eftir hinn hræðilega glæp og glímdi hún við áfallastreituröskun. Hún tók síðan miklum framförum og segir í vottorði:
„Hún hefur tekist á við vanlíðan sína af miklu hugrekki og notað uppbyggileg bjargráð. Líðan hennar hefur farið batnandi að hennar mati og smám saman hefur dregið úr áfallastreitueinkennum.“
Á öðrum stað vottorðsins segir:
„Allt viðmót [stúlkunnar] bendir til þess að hún hafi upplifað ógn, bjargarleysi og viðbjóð í meintu kynferðisbroti. Sálræn einkenni hennar í kjölfar áfallsins samsvara einkennum sem eru þekkt hjá fólki sem hefur upplifað alvarleg áföll eins og líkamsárás, nauðgun, stórslys eða hamfarir. Niðurstöður sjálfsmatskvarða samsvöruðu vel frásögnum hennar í viðtölum. Hún virtist ávallt hreinskilin, trúverðug og samkvæm sjálfri sér.“
Wiktor Tomasz var dæmdur í tveggja ára fangelsi í héraðsdómi Austurlands og til að greiða stúlkunni 1.5 milljónir króna í miskabætur. Wiktor áfrýjaði til Landsréttar sem birti dóm sinn í dag. Að áliti dómsins þótti framburður stúlkunnar trúverðugur og skilmerkilegur í öllum megin atriðum. Þá hafi frásögn hennar verið ítarleg og einlæg. Wiktor Tomasz þótti hins vegur ekki trúverðugur og reikull í framburði.
Þar er niðurstaðan sú sama, tveggja ára fangelsi. Bætur til stúlkunnar eru þó 300 þúsund krónum hærri.
Í dómnum kemur fram að Wiktor hafi verið dæmdur í 45 daga skilorðsbundið fangelsi fyrir að kjálkabrjóta unga piltinn, þann sama dag og hann nauðgaði stúlkunni. Einnig var hann þann 1. nóvember 2018 dæmdur til að greiða sekt til ríkissjóðs vegna fíkniefnaksturs.
Wiktor var dæmdur til vægari refsingar vegna ungs aldurs en hann var 18 ára þegar hann braut kynferðislega á stúlkunni. Rannsókn lögreglu lauk vorið 2018 og ljóst að málið dróst hjá ákæruvaldinu.
Niðurstaðan var því eins og áður segir tveggja ára fangelsi, óskilorðsbundið.