Ingimar Ágúst Guðmarsson, fæddur 1980, fannst látinn í Vestmannaeyjahöfn rétt eftir hádegi í gær. Lögreglunni barst tilkynningu um að hans væri saknað og skömmu síðar fannst hann látinn í höfninni. Hann lætur eftir sig eiginkonu og tvö börn.
Ingimar starfaði sem kranabílstjóri í Vestmannaeyjum. Hann var aðeins fertugur er hann lést. Ásmundur Friðriksson, þingmaður Sjálfstæðisflokksins, var tengdafaðir Ingimars undanfarin tuttuga ár.
„Tengdasonur minn var öflugur og góður drengur. Hann var prýðispiltur alla leið og það er ekki annað hægt en að fara með hlý orð um þennan dreng. Þetta er bara mjög erfitt og gífurleg sorg bæði í fjölskyldunni og í allri eyjunni,“ segir Ásmundur í samtali við Mannlíf.
Ásmundur tjáir sig einnig á Facebook en þar segir hann:
„Mikill harmur er kveðinn að fjölskyldu okkar Siggu. Ingimar Ágúst Guðmarsson tengdasonur okkar, eiginmaður Ásu Hrannar fannst látinn í höfninni í Vestmannaeyjum í gær. Þau eiga tvo drengi Ragnar Orra 16 ára og Ágúst Jörund 4 ára.
Það er ár síðan fjölskylda okkar fylgdi Leif Magnúsi Grétarssyni Thisland til grafar og á komandi dögum verður útför Páls Árnasonar föður tengdasonar okkar Guðmundar Árna. Og þá verður útför Ingimars gerð frá Landakirkju.
Það er mikið búið að leggja á fjölskyldu okkar og foreldra Ingimars en við stöndum þétt saman og þökkum fyrir samúð og kærleika.
Í kvöld tendruðu Magnús Karl og Elías Jörundur krossmark á Heimakletti til minningar um Ingimar Ágúst.“