42 ára gömul kona lést á föstudag, sólarhring eftir að hún var útskrifuð af bráðamóttöku Landspítalans. Málið er komið í farveg innan spítalans, og verið að skoða hvort álag þar hafi haft eitthvað með málið að gera, eins og segir á vef RÚV.
Embætti Landlæknis hafði ekki borist tilkynning um atvikið í morgun.
Samkvæmt fréttastofu RÚV var konan flutt með sjúkrabíl á bráðamóttöku á fimmtudaginn en talið var að hún hefði fengið blóðsýkingu. Konan var orðin máttvana og átti bæði mjög erfitt með gang og með að hreyfa hendur. Hún var send heim í hjólastól, nokkrum klukkustundum eftir komuna á bráðamóttökuna. Konan lést á heimili sínu á föstudagsmorgun.
„Álagið á Bráðamóttöku hefur verið með minna móti frá því að Covid-19 faraldurinn hófst, en auðvitað kann að vera að einhver álagstoppur hafi haft áhrif, en það bíður nánari skoðunar,“ segir í skriflegu svari spítalans við fyrirspurn fréttastofu RÚV.