Aðalheiður nokkur er síður en svo sátt eftir viðskipti sín við lágvöruverslun Krónunnar nýverið. Þar keypti hún sér tvær tegundir af lasagna sem hún segir hafa verið lélegustu kaup ævi sinnar.
Aðalheiður segir skoðun sína á viðskiptunum í fjölmennum verðlagshópi á Facebook, Vertu á verði – eftirlit með verðlagi. Þar segir hún:
„Í gær keypti ég lasagna i Krónunni frá Krónunni. Bæði venjulegt lasagna og kjúklingalasagna. Þetta var það lélegasta lasagna sem ég hef nokkurn tíma keypt. Það voru 7 lög af blöðum með sósu á milli en varla nokkuð kjöt. Mjög léleg kaup.“
Í hópnum fær Aðalheiður fyrst og fremst á baukinn fyrir að impra á málefninu þar enda sé hópurinn ekki til þess ætlaður að ræða mat. Því eru hins vegar ekki allir sammála. Sigurður er einn þeirra.
„Hvað maður fær fyrir peninginn snýst um verð og verðlag og á því erindi á þessa síðu. Svindl og svik í þessum geira er angi af því. Eins og t.d. rúnstykki með birki sem ég hef keypt um árabil en eru þessa dagana í Krónunni orðin svo lítil að ég verð að kaupa tvö stykki í staðinn fyrir eitt áður á mann,“ segir Sigurður.
Sólveig er sammála. „Mér finnst skipta máli verðlagning á réttum. Eins og þetta lasagna .. þar sem það hefur verið fokdýrt og hún haldið sig kaupa gæða vöru sem reindist svo allt annað,“ segir Sólveig.
Ásta virðist líka kannast við vandamálið og fundið sína eigin lausn. „Ég hef venjulega keypt bara lítið lasagna. Því það er frekar lítið af hakki og kaupi svo hakk og læt á stórt fat og dreifi svo hinu yfir,“ segir Ásta.