2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Æðruleysi eldri borgara

Aðstandendur íbúa á Hrafnistu hafa verið beðnir að halda sig fjarri séu þeir lasnir eða hafi verið á svæðum þar sem COVID-19 geisar. Forstjórinn, Pétur Magnússon, segir þetta mæta skilningi og kveður íbúana sjálfa taka hlutunum með stóískri ró.

Uppfært: Neyðarstjórn Hrafnistu hefur tekið þá ákvörðun að loka öllum Hrafnistuheimilunum fyrir heimsóknum ættingja og annarra gesta frá og með 7. mars 2020 þar til annað verður formlega tilkynnt. Er þetta gert að höfðu samráði við Sóttvarnarlækni og Landlækni eftir að Neyðarstigi almannavarna var lýst yfir í gær.

Pétur Magnússon.

Hann segir að margt eldra fólk taki tíðindum sem þessum af miklu æðruleysi. „Íbúarnir okkar eru flestir með undirliggjandi sjúkdóma og eru þess vegna áhættuhópur fyrir því að veikjast alvarlega,“ útskýrir hann í samtali við Mannlíf. „Við báðum þá sem eru með einkenni kvefs eða flensu, eða hafa verið að ferðast á skilgreind áhættusvæði, að koma helst ekkert í heimsókn.“

AUGLÝSING


Hann tekur fram að þrír starfsmenn Hrafnistu séu í sóttkví. „Það er mjög mikið áhyggjuefni ef fólk tekur skilaboð um að halda sig í sóttkví ekki alvarlega. Þessi veira mun ekki hafa teljandi áhrif á nema lítinn hluta fólks. En það snýst allt um að hlífa og vernda þá sem eru veikir fyrir.“ Hann ítrekar að margt eldra fólk hafi reynt ýmislegt um ævina, og haldi því alla jafna ró sinni.

Hundrað sjálfboðaliðar til taks

Hjálparsíma Rauða krossins berast um 14 þúsund símtöl á ári. „Það er mjög mikið álag á okkur núna,“ segir Sandra Björg Birgisdóttir verkefnastjóri en í símann svara sjálfboðaliðar allan ársins hring. „Við finnum alltaf fyrir því þegar eitthvað er í gangi í þjóðfélaginu. Þá fjölgar þeim sem hringja og netspjallið eykst. Við bætum við línum eftir þörfum,“ útskýrir hún. Sandra bendir á að Rauði krossinn sé hluti af almannavörnum og við neyðarástand breytist hjálparsíminn í upplýsingaveitu til almennings. „Við höfum verið að sinna því líka. Við erum með um hundrað sjálfboðaliða í hjálparsímanum,“ segir hún.

Sandra segir óljóst hve lengi þetta ástand muni vara. „Fólki líður illa yfir þessu og það er mikil óvissa. Hingað hringja margir sem glíma við kvíða en svona ástand getur ýtt undir kvíðann hjá þeim sem eru kvíðnir fyrir. Þá getur verið gott að tala við einhvern í nafnleysi og trúnaði. Ráðgjafar okkar eru mjög vel þjálfaðir í þessum málum.“

„Við erum á óvissustigi“

Framkvæmdastjóri lækninga á Sjúkrahúsinu á Akureyri segir undirbúning í fullum gangi
„Okkar innri viðbrögð hafa meðal annars verið að fara yfir viðbragðsáætlun við farsóttum,“ segir Sigurður E. Sigurðsson, framkvæmdastjóri lækninga á Sjúkrahúsinu á Akureyri, í samtali við Mannlíf. Landspítalinn og Sjúkrahúsið á Akureyri eru einu sjúkrahúsin sem sinna munu alvarlega veikum einstaklingum vegna COVID-19. „Við erum til staðar fyrir þá sem þurfa á innlögn að halda á okkar svæði.“ Það er aðallega Norðurland en ekki er óhugsandi að veikir einstaklingar á Austurlandi yrðu sendir til Akureyrar.

Sjúkrahúsið á Akureyri hefur enn ekki þurft að taka á móti smituðum einstaklingum. Tveir starfsmenn sjúkrahússins eru í sóttkví og viðbragðsstjórn sjúkrahússins hefur hist og fundað. „Við erum á óvissustigi,“ segir framkvæmdastjórinn.

Sigurður E. Sigurðsson.

Sigurður segir að undanfarnar vikur hafi fulltrúar sjúkrahússins fundað reglulega með sóttvarnalækni, landlækni, Heilbrigðisstofnun Norðurlands, lögreglu og Almannavörnum. Þeir fundir hafi miðað að því að búa sjúkrahúsin sem best undir það sem koma skuli. „Við höfum verið að fylgja ráðleggingum sem koma frá landlækni um hvernig við eigum að snúa okkur í þessu.“ Undirbúningurinn snúist ekki síst um að svara spurningum heilbrigðisstarfsfólks og reyna að sjá fyrir hvernig hægt er að halda óskertri þjónustu ef starfsfólk veikist.

„Við höfum verið að uppfæra birgðastöðu á hlífðarfatnaði og sérvöldum lyfjum – sem við þurfum að eiga nóg af,“ segir Sigurður um það til hvaða ráðstafana hafi verið gripið af hálfu sjúkrahússins. Hann tekur skýrt fram að þar sé um að ræða lyf sem slegið geti á einkenni þeirra sem veikir eru. Engin lyf séu til við COVID-19.

Fram hefur komið í fréttum að Landspítalinn hafi yfir 26 öndunarvélum að ráða. Sigurður segir að öndunarvélarnar á Sjúkrahúsinu á Akureyri séu þrjár. Það gefi ágæta hugmynd um stærðarmun sjúkrahúsanna tveggja. Hann bendir á að viðbrögðin á Íslandi hafi miðast við að teygja sem mest úr faraldrinum og reyna að fækka þeim sem verða alvarlega veikir í einu. „Það yrði erfitt að fá marga illa veika inn á stuttum tíma. Þá verður meiri hætta á því að við myndum kaffæra þessari ýtrustu heilbrigðisþjónustu. Það er betra að fá fólk inn yfir lengri tíma. Við gerum okkar besta til að vera vel undir þetta búin. Hér er unnið mjög ötult starf en það er í mörg horn að líta.“

Lestu meira: Fólk með sjúkdóma óttast um líf sitt

Lestu meira

Annað áhugavert efni

Nýjast á Mannlíf.is

Nýjast á Gestgjafanum