Töluvert var um umferðalaga- og fíkniefnabrot seinnipartinn í gær og nótt samkvæmt dagbók lögreglu á höfuðborgarsvæðinu.
Á áttunda tímanum í gærkveldi barst tilkynning til lögreglu um götuslagsmál milli tveggja ævareiðra manna í austurhluta borgarinnar. Ökumaður hafði stöðvað bifreið sína þegar gangandi vegfarandi gekk í veg fyrir hana. Ökumaðurinn taldi rétt til að stíga út úr bifreið sinni og ræða við manninn en endaði samtalið í slagsmálum. Náði ökuþórinn þá í prik í bifreiðina og var með ógnandi tilburði gagnvart þeim gangandi. Ökumaðurinn fékk sár á augabrúnina og var gert að því á Bráðadeild Landspítalans. Lögreglan tók skýrslur af mönnunum.
Laust fyrir klukkan eitt í nótt var tilkynnt um líkamsárás við Norðlingaskóla. 17 ára piltur með áverka á höfði var á vettvangi og hann fluttur á Bráðadeild til aðhlynningar. Móður árásarþola var tilkynnt um stöðuna og ætlaði hún að fara á Bráðadeild. Hópur unglinga var á vettvangi og en samkvæmt vitnum var árásaraðili farinn á bak og brott. Barnaverndaryfirvöldum verður tilkynnt um málið.