Í nýju myndbandi fyrir Hreyfingu UNICEF ræðir Ævar Þór Benediktsson, leikari, rithöfundur og góðvinur UNICEF á Íslandi, við börn á Íslandi um breytingar. Nú þegar heimsfaraldur COVID-19 hefur gengið yfir og gjörbreytt samfélögum og samskiptum okkar á milli síðustu vikur, er gott að staldra örlítið við.
Sum börn hafa nefnilega haft áhyggjur af þessum breytingum og fundið fyrir kvíða en í myndbandinu, sem ætlað er börnum og ungmennum, deilir Ævar Þór góðum ráðum til að kveða niður þær áhyggjur og jafnvel hjálpa öðrum sem eiga erfitt í leiðinni.
Ævar Þór fer einnig yfir það hvernig UNICEF, Barnahjálp Sameinuðu þjóðanna, er að hjálpa börnum um allan heim í þessum heimsfaraldri. UNICEF hvetur alla foreldra og forráðamenn til að horfa á myndbandið með börnunum í lífi sínu.