Þingflokkur Pírata hefur lagt fram frumvarp um breytingar á lögum til að bæta stöðu kvára og stálpa í samfélaginu. Einn þingmaður Viðreisnar, Hanna Katrín Friðriksson, er meðflutningsmaður frumvarpsins.
Breytingarnar sem Píratarnir og Hanna Katrín vilja ná fram eru þrenns konar. Að fólki verði fjálst að velja endingu foreldrisnafns óháð opinberri kynskráningu, að heimila fólki hlutlausa skráningu kyns í aukavegabréfi og að útgáfa aukavegabréfins verði gjaldfrjáls.
Fyrsta breytingin snýr að því að kynskráning hafi ekki áhrif á það hvers konar foreldrisnöfn fólk má velja sér. Þannig verði orðin foreldri eða foreldrisnöfn tekin upp í lögum um mannanöfn í stað „föður- og móður“ eða „föður- og móðurnafna“. Þá verði orðin foreldri foreldri síns tekin upp í stað „afa síns“. Foreldrisnöfn eru mynduð þannig að á eftir eiginnafni eða eiginnöfnum og millinafni, ef því er að skipta, kemur nafn foreldris í eignarfalli með eða án viðbótarinnar son, dóttir eða bur. Þá verði orðin „hvort heldur er í karllegg eða kvenlegg“ í lögunum felld á brott. Kjarninn greinir frá.
„Núverandi fyrirkomulag stendur í vegi fyrir því að hluti kynsegin fólks geti að fullu nýtt rétt sinn til að breyta nafni sínu. Þetta stangast á við það markmið laga um kynrænt sjálfræði að tryggt sé að kynvitund fólks njóti viðurkenningar, enda er rétturinn til nafns stór þáttur í rétti fólks til að skilgreina kyn sitt. Því er hér lagt til að allar útgáfur foreldrisnafna sem gildandi lög heimila standi einstaklingum til boða óháð kynskráningu viðkomandi,“ segja Píratarnir.