Áframhaldandi jarðskjálftavirkni mælist í grennd við Grindavík, en nóttin var nokkuð tíðindalítil er fram kemur á vef Veðurstofunnar. Frá miðnætti hafa mælst um 40 skjálftar á svæðinu, flestir undir 2 að stærð. Klukkan 19:04 í gærvköldi mældist skjálfti af stærð 3,3 um 2 km. norðaustur af Grindavík.
Frá 21. janúar hafa yfir 1000 skjálftar verið staðsettir á svæðinu, þar af um 700 yfir helgina og voru þeir flestir staðsettir í SV/NA stefnu um 2 km NA af Grindavík.
Nýjasta GPS úrvinnslan og gervitunglamyndir sýnir áframhaldandi landris á svæðinu vestan við Þorbjörn. Í heildina hefur land risið yfir 4 cm frá 20. janúar sl.
Með landrisi má búast við áframhaldandi jarðskjálftavirkni. Líklegasta skýring þessarar virkni er kvikuinnskot á 3-9 km dýpi rétt vestan við fjallið Þorbjörn og líklegast er að virknin ljúki án eldsumbrota.
Sjá einnig: Jörð kraumar í „nafla alheimsins“