Arnari nokkrum, íbúa í Breiðholtinu, var mjög brugðið á heimili sínu eftir að tveir unglingspiltar köstuðu ítrekað ísklökum í gluggana. Nú þegar hefur hann upplifað tvær slíkar árásir á heimili sitt.
Arnar greinir frá klakakastinu í hverfishópi íbúa á Facebook, Íbúasamtökin Betra Breiðholt. Þar segir hann:
„Það eru tveir ungir strákar um 12 ára gamlir sem að kasta ísklökum í glugga hér í Vesturbergi ítrekað. Annar er nokkuð feitlagin og hinn litill og mjór og báðir svartklæddir. Annar í hettupeysu og hinn í dúnúlpu,“ segir Arnar og bætir við:
„Þeir hafa kastað nú þegar 2 sinnum í eldhúsgluggann okkar en ég geri ráð fyrir að þeir séu bara svo öfundssjúkir hvað eldhúsglugginn er flott skreyttur hjá okkur.“
Hrönn er einn íbúanna sem ekki líst á blikuna. „Æj er ekki hægt að ná tali af þeim?,“ spyr hún. Anna virðist kannast við svipaða hegðun ungmenna í hverfinu. „Kannast við svona einelti. Eflaust leiðist þeim, spurning að bjóða þeim piparkökur,“ segir Anna.
Snædís telur sig vita hvaða drengir þetta eru. „Gæti trúað að þetta séu þeir sömu og voru um daginn að þykjast ætla að hlaupa fyrir bílinn minn þegar ég keyrði vesturbergið.. frekar óþægilegt,“ segir Snædís.