Ásgerður Jóna Flosadóttir, formaður Fjölskylduhjálpar Íslands, segir fólk sem ekki gat fengið aðstoð hjá félaginu í síðustu viku hreyta í sig ónotum og illmælgi.
Ástæðan er sú að Fjölskylduhjálpin hefur ekki tök á að keyra út matarsendingar í þessari viku. Í færslu sem Ásgerður skrifar á Facebook segir hún að þessu fólki líði illa, en ummælin særi hana djúpt.
Facebook- færslan í fullri lengd:
Mikið hryggir það þegar fólk sem ekki fékk mataraðstoð hjá Fjölskylduhjálp Íslands í síðustu viku þegar við sendum mat til 570 heimila á höfuðborgarsvæðinu hreytir í mann ónotum og illmælgi þar sem við erum ekki með aðstoð í þessari viku. Þessu fólki líður mjög illa en þetta særir djúpt og það er vont. Nú verðum við að safna til að geta keypt matvæli en fólk virðist ekki vita að Borgin styður okkur um 42.600 á mánuði og Ríkið styður um 100.000 á mánuði. Þessir styrkir duga fyrir rafmagni, hita og síma á mánuði. En í guðanna bænum, við reynum að gera okkar besta. Fjölskylduhjálp Íslands er ekki rekin af hinu opinbera svo það sé sagt. Verum góð við hvert annað.