Karlmaður fæddur 1992 lést í gær eftir fall af fjórðu hæð á fjölbýlishúsi við Þingholtsstræti, talið er hann hafi verið að klifra utan á húsinu.
DV greinir frá, en samkvæmt heimildum DV og Mannlífs voru atvik með þessum hætti, en lögregla hefur ekki sent frá sér tilkynningu.
Fjölmargir minnast unga mannsins á Facebook-síðu hans, og átti hann stað í minningum og hjörtum margra. Ein vinkona hans úr grunnskóla skrifar:
„Ég á ekki orð. Elsku […], ég man að þú varst einn af fyrstu vinum mínum í […]skóla og þegar litla systir mín lenti í einelti fórstu til foreldra stelpnanna og talaðir við þau. Ég var bara um daginn að skoða myndbönd í tölvunni sem þú hafðir tekið á gömlu Macbook tölvuna mína sem þú stalst alltaf í tímum og fórst að leika þér að taka myndir og myndbönd. Ég hugsaði með mér að ég þyrfti að fara að heyra í þér. Mikið sé ég eftir því núna að hafa ekki gert það. Hvíldu í friði hjartahlýi engill.“
Uppfært kl. 11.07 eftir tilkynningu frá lögreglu:
Lögreglan á höfuðborgarsvæðinu rannsakar nú andlát karlmanns á þrítugsaldri. Maðurinn fannst mikið slasaður við hús í miðborg Reykjavíkur í fyrrinótt og var fluttur á slysadeild. Hann lést svo á Landspítalanum um miðjan dag í gær. Rannsókn lögreglu beinist m.a. að því með hvaða hætti maðurinn féll fram af húsinu.
Ekki er hægt að veita frekari upplýsingar um málið að svo stöddu.