19 ára gamall maður lést í banaslysi við Framhaldsskólann á Laugum í dag. Varð hann fyrir bíl. Var hann meðvitundarlaus er viðbragðsaðilar komu á vettvang og endurlífgunartilraunir báru ekki árangur.
Í tilkynningu frá Lögreglunni á Norðurlandi eystra segir:
„Kl. 14:03 í dag barst lögreglunni á Norðurlandi eystra tilkynning um að slys hefði orðið við Framhaldsskólann á Laugum. Þar hefði 19 ára karlmaður orðið fyrir bíl. Þegar viðbragðsaðilar komu á vettvang var maðurinn meðvitundarlaus og báru endurlífgunartilraunir ekki árangur. Nokkrir nemendur úr skólanum urðu vitni að slysinu og hefur áfallahjálparteymi Rauða krossins verið virkjað til að hlúa að þeim. Rannsókn á tildrögum slyssins er á algjöru frumstigi og vettvangsrannsókn enn yfirstandandi þegar þetta er skráð. Lögreglan getur því ekki veitt frekari upplýsingar um málið að svo komnu.“