Alvarlegt umferðaslys átti sér stað um klukkan þrjú í nótt á Meðallandsvegi. Samkvæmt stöðufærslu Lögreglunnar á Suðurlandi kemur fram að bíll hafi oltið skammt sunnan við Kirkjubæjarklaustur. Þyrla Landhelgisgæslunnar var kölluð á staðinn og flutti hún tvo alvarlega slasaða af vettvangi. Samkvæmt fréttum á mbl.is lenti þyrlan í Reykjavík um hálf sex í nótt.
Í færslu Lögreglunnar á Suðurlandi stendur:
Viðbragðsaðilar á Suðurlandi voru kallaðir til vegna alvarlegs umferðarslyss á Meðallandsvegi, skammt sunnan við Kirkjubæjarklaustur, um kl. 02:55 í nótt þar sem bifreið hafði oltið. Þyrla LHG var kölluð út og flutti hún tvo alvarlega slasaða af vettvangi á slysadeild Landspítalans í Fossvogi.
Vegurinn er lokaður við Þykkvabæ og Seglbúðaveg vegna vinnu á vettvangi og er ljóst að rannsókn mun taka einhvern tíma en að henni koma, auk lögreglunnar á Suðurlandi, rannsóknarnefnd samgönguslysa og tæknideild Lögreglunnar á Höfuðborgarsvæðinu.
Ekki verða veittar frekari upplýsingar að svo stöddu.