Meirihluti bæjarstjórnar Ísafjarðarbæjar hefur ákveðið að ráða Birgi Gunnarsson í starf bæjarstjóra Ísafjarðarbæjar, samkvæmt tilkynningu frá bænum. Birgir mun hefja störf 1. Mars, en ráðningin er með fyrirvara um samþykki bæjarstjórnar sem kemur næst saman 20. febrúar.
Birgir var forstjóri Reykjalundar endurhæfingarmiðstöðvar í Mosfellsbæ til ársloka 2019 og þar áður var hann forstjóri á Heilbrigðisstofnuninni á Sauðárkróki, frá 1991-2007.
Birgir er fæddur árið 1963 og er uppalinn á Siglufirði og lauk þaðan grunnskólanámi. Hann er stúdent frá Fjölbrautaskóla Norðurlands vestra á Sauðárkróki og rekstrarfræðingur frá Háskólanum á Bifröst. Því til viðbótar lauk hann námi í rekstri og stjórnun frá Háskólanum í Gautaborg. Birgir á þrjú börn, Sævar, Gunnar og Birgittu, og er í sambúð með Astrid Boysen.
Birgir hefur gegnt ýmsum trúnaðarstörfum, svo sem setið stjórn í Norræna heilbrigðisháskólans í Gautaborg, verið formaður Landssambands heilbrigðisstofnana, formaður Félags forstöðumanna heilbrigðisstofnana og ýmislegt fleira.