María er 160 sentimetrar á hæð, grannvaxin, gráhærð og stuttklippt. Hún er heilabiluð en er líkamlega hraust. María var klædd í rauðbrúna úlpu/peysu , svartar buxur og dökkbláa gönguskó í morgun og er með gleraugu með dökkri umgjörð.
Um sjötíu björgunarsveitamenn taka nú þátt í leitinni að Maríu Björnsdóttur sem lögregla lýsti eftir fyrr í dag. María er 82 ára en síðast sást til hennar fara frá hjúkrunarheimilinu Hrafnistu í Hafnarfirði um klukkan 8.30 í morgun.
Davíð Már Bjarnason, upplýsingafulltrúi Landsbjargar, segir að leitin sé nú bundin við svæðið í kringum Hrafnistu. „Það eru um sjötíu búnir að svara útkallinu og mættir á svæðið en verið er að leita á Garðarholtinu, Álftanesi og í Hafnarfirði, sem sagt svæðinu í kringum Hrafnistu.“ Landsbjörg hefur verið í samstarfi við lögregluna í dag við að skipuleggja leitina út frá þeim upplýsingum sem lögreglu hafa borist. Björgunarsveitamenn leita fótgangandi, á hjólum og öðrum farartækjum.
Davíð ítrekar að ábendingar frá almenningi séu afar mikilvægar við að leysa mál líkt og þetta og biður hann fólk um að hafa augun opin.
Þau sem geta gefið upplýsingar um ferðir Maríu, eða vita hvar hana er að finna, eru vinsamlegast beðin um að hafa tafarlaust samband við lögregluna í síma 112.