Björn Björnsson, fyrrverandi skólastjóri, er látinn. Hann var 82 ára gamall og greindi Morgunblaðið frá andláti hans.

Björn fæddist árið 1943 í Eyjafirði og voru foreldrar hans Björn Jóhannsson og Emma Elíasdóttir. Hann ólst upp í Eyjafirði en flutti suður um tvítugt og starfaði þar við ýmis störf.

Hann flutti til Sauðárkróks árið 1968 en tveimur árum síðar hóf hann kennslu í Barnaskóla Sauðárkróks. Hann skráði sig í kennaranám og útskrifaðist þaðan 1972 og var tveimur árum síðar orðinn skólastjóri Barnaskólans.

Hann færði sig um sett árið 1998 og var skólastjóri Grunnskólans á Hofsósi til 2005.

Björn tók þátt í stjórnmálum á ævinni og var bæjarfulltrúi fyrir Sjálfstæðisflokkinn frá 1990 til 1998 á Sauðárkróki. Þá var hann félagi í Oddfellowreglunni í meira en 40 ár og þótti hann frábær ræðumaður og var eftirsóttur veislustjóri.

Björn lætur eftir sig þrjú börn.