Þyrlusveit Landhelgisgæslunnar hefur haft í nógu að snúast síðasta sólarhringinn en hún annaðist þrjú útköll, þar af tvö út á sjó.
Fram kemur á síðu Gæslunnar að skipstjóri togara hafði samband við stjórnstöð Landhelgisgæslunnar á þriðja tímanum í nótt vegna bráðra veikinda um borð. Var togarinn þá staddur um 14 sjómílur út af Búðarhorni á Vestfjörðum og var áhöfn þyrlu Landhelgisgæslunnar kölluð á vettvang. Gengu hífingar vel og var skipverjinn fluttur á sjúkrahús í Reykjavík.
Þá var þyrlan kölluð út í tvígang í gær. Fyrra útkallið kom vegna göngukonu sem datt og slasaðist á fæti á Breiðarmerkujökli en hún var sótt og flutt á Landspítalann. Seinni partinn í gær óskaði svo skipstjóri togara eftir aðstoð þyrlusveitar vegna slyss sem varð um borð. Skipið var þá statt á miðjum Faxaflóa. Kölluð var út áhöfnin á TF-GNA, þyrlu Gæslunnar, á mesta forgangi. Var skipverjinn hífður um borð í þyrluna á fluttur með hraði á sjúkrahús í borginni.