Halldór Auðar Svansson, fyrrum borgarfulltrúi og nú varaþingmaður Pírata deildi á Facebook í dag frétt Vísis þar sem sagt er frá mismunandi viðbrögðum Dags B. Eggertssonar borgarstjóra og Brynjars Níelssonar, aðstoðamanns dómsmálaráðherra, við árásir á húsnæði Sósíalistaflokksins. Hneykslast Halldór á viðbrögðum Brynjars sem talar um hræsni í viðbrögðum Gunnars Smára við árásunum.
„Gunnar Smári og Sósíalistar hafa ekkert alltaf sparað gagnrýni á Dag og Samfylkinguna (enda væri þetta fólk væntanlega bara í Samfylkingunni ef því hugnaðist sá flokkur) en Dagur lætur það auðvitað ekkert þvælast fyrir því að fordæma ofbeldishótanir. Þær eru bara hreinlega í annarri og verri deild en umræða, hversu harkaleg sem hún kann að vera. Það á ekki að vera flókið að leggja ágreining til hliðar þegar svona kemur upp á og leggja áherslu á að þarna sé fólk komið yfir strikið – en er samt greinilega of flókið fyrir aðstoðarmann innanríkisráðherra. Í hans heimi er þetta bara sjálfsagður hlutur sem fylgir bransanum, óþarfi að vera eitthvað að kvarta yfir þessu. Gunnar Smári kallaði þetta víst líka bara yfir sjálfan sig með sinni orðræðu.“
Rifrildi kviknuðu þegar bróðir Brynjars, Gústaf Níelsson skrifaði litla en leiðinlega athugasemd við færslu Halldórs: „Þau slá ótt og títt hérahjörtun.“
Orri nokkur svaraði og var síður kurteisari en Gústaf. „Þú ert viðurstyggilegt gerpi og aumingi.“
Gústaf svaraði að bragði: „Takk, þekkjumst við eitthvað?“
Halldór Auðar svaraði þá Gústaf: „Æi slepptu bara þessum aumu ásökunum um hugleysi. Eini tilgangur þeirra er að forðast umræðuefnið, ofbeldishótanir, með því að væna þann sem talar um það sem vandamál um aumingjaskap fyrir að kippa sér upp við það. Færa sumsé fókusinn á þann sem hefur orð á vandamálinu. Ofbeldi er ekki fordæmt vegna þess að viðkomandi er hræddur við það, það er fordæmt af því það eyðileggur samfélög að ofbeldi fái að þrífast án þess að því sé andmælt.“
Unnar nokkur stígur þá inn í rifrildið og skýtur fast á Gústaf og bróður hans: „Stundum hugsa ég til þess hvers Níelsar þessara heims þurfa að gjalda, og af hverju þið bræður hatið orðstír föðurs ykkar svona.“
Gústaf byrjaði á að svara Halldóri: „Þú þarft ekki að vera með þessa tilgerð. Sumt fólk kann því ágætlega að baða sig í ljósi fjölmiðlanna. Gunnar Smári og Dagur eru af þeirri gerðinni. Löggan á að leysa úr svona máli, sé það gerlegt, en ekki fjölmiðlar.“
Að lokum svaraði hann Unnari: „Það er gleðilegt að þú skulir hugsa eitthvað, en mér sýnist það vera þér ofraun.“