- Auglýsing -
Brynjar Níelsson er iðinn við að tjá skoðanir sínar á fésbókarsíðu sinni og lætur þar fátt eftir sitja. Í nýjustu færslu sinni veltir hann því fyrir sér hvort hann sé fáviti eða geðveikur. Færslan er jafnframt gagnrýni á borgarskipulagsbreytingar sem framkvæmdar hafa verið af sitjandi meirihluta. Þá hafa Óttar Guðmundsson, nefndur Geðlæknirinn, og Egill Helgason, nefndur Geðþekki sjónvarpsmaðurinn, nýverið stigið fram og gagnrýnt torg borgarinnar annars vegar og hjólreiðastæði hins vegar.
„Geðlæknirinn á iðulega góða spretti í Bakþönkum Fréttablaðsins. Geðþekki sjónvarpsmaðurinn í Silfrinu hittir einnig naglann oft á höfuðið hér á fésbókinni. Geðlæknirinn benti á auð torg víðs vegar um borgina sem kostað hefur milljarða að gera og sjónvarpsmaðurinn á alla hjólastandana, sem aldrei sést hjól við. Við höfum ekki einu sinni nógu marga óreglumenn til að manna þessi torg.“
Segir meirihlutann draumóramenn
Brynjar ræðst því næst að kjarnanum og segir sitjandi meirihlutann raunveruleikafirrta draumóramenn sem annað hvort hafa dvalið of lengi í útlöndum eða trúir á hækkandi hitastig vegna loftslagsbreytinga. Enda þekkir Brynjar sjálfur ekki til neinna ráðamanna í öðrum löndum sem hafa farið í jafndýrar framkvæmdir og borgarlínu á meðan nýting almenningssamganga sé ekki nema þrjú prósent.
„Svona gerist bara þegar draumóramenn í litlum tengslum við veruleikann stjórna heilu sveitarfélagi í langan tíma og geta hækkað gjöld og álögur eftir hentugleika. Annað hvort hefur þetta fólk dvalið of lengi í útlöndum eða trúir því að hitinn hér á landi muni hækka mjög skart á næstu misserum vegna loftslagsbreytinga. Þá veit ég ekki til þess að ráðamönnum í öðrum löndum hafi dottið í hug að fara í framkvæmdir við borgarlínu upp á hundruð milljarða á sama tíma og nýting í strætó er 3 prósent.“
Fáviti eða geðveikur?
Að lokum veltir Brynjar því fyrir sér hvort hann sé fáviti eða hugsanlega geðveikur og bendir á, sér til rökstuðnings, að Óttar Guðmundsson, hafi tjáð að öll íslenska þjóðin glími við geðraskanir.
„Ég er kannski fáviti, eins og Bubbi vinur minn segir. Gæti líka verið geðveikur enda sýnist mér á greiningum geðlæknisins í Bakþönkum að þjóðin öll glími við geðraskanir meira og minna og hafi gert frá þjóðveldisöld.“