„Þetta eru náttúrulega vonbrigði. Ég bjóst við því að komast áfram en þetta gekk ógeðslega vel og ég er bara mjög góð,“ sagði Diljá Pétursdóttir, í samtali við Vísi, eftir að úrslit undankeppni Eurovision lágu fyrir í gærkvöldi. Diljá stóð sig vel á sviðinu en þrátt fyrir það komst hún ekki áfram í úrslit.
Keppnin í ár fer fram í Liverpool og aðspurð sagðist Diljá ánægð með sína frammistöðu. Hún sagðist allt sem hún hafði stjórn á hafa gegið vel og því gæti hún ekki verið annað en ánægð. „Þannig ég bara sef út á morgun og hef það rólegt,“ sagði Diljá sem styður Sviss, Litháen, Svíþjóð og Finnland. Þá segist hún ekki hrædd við að skoða samfélagsmiðlana í kjölfar kvöldsins. „Ég er ekki búin að kveikja á símanum mínum en hef heyrt að viðbrögðin hafi verið mjög góð.“
