Algjör þögn ríkir hjá dómsmálaráðuneytinu varðandi fund aðstoðarmanns Jóns Gunnarssonar dómsmálaráðherra, við Namibíska embættismenn í sumar.
Mannlíf sendi þann 27. júlí tölvupóst á dómsmálaráðuneytið og óskaði eftir svörum við nokkrum spurningum með vísun í upplýsingalög. Spurningarnar vörðuðu fund Brynjars Níelssonar aðstoðarmanns Jóns Gunnarssonar dómsmálaráðherra, sem hann átti við Namibíska embættismenn í sumar. Var tilgangur fundarins sá, samkvæmt Brynjari, að ræða hið svokallaða Samherjamál sem er til rannsóknar hjá yfirvöldum í Afríkuríkinu. Spurningarnar voru svohljóðandi:
1. Hver var tilgangur fundarins?
2. Bar mál gegn Samherja á góma á fundinum?
3. Hverjir voru nákvæmlega viðstaddir fundinn?
4. Hvernig stóð á að fundurinn var haldinn? Hver bað um fundinn?
5. Hversu lengi stóð hann yfir?
Þá óskaði Mannlíf eftir minnisblaði frá fundinum.
Nú, tíu dögum síðan, hefur ekkert svar borist úr ráðuneytinu. Samkvæmt 17. gr. upplýsingalaga skal afgreiða beiðni svo fljótt sem verða má og hafi beiðni ekki verið afgreidd innan sjö daga skal skýra frá ástæðum tafa. Þann þriðja ágúst sendi Mannlíf ítrekun og bað um útskýringu á töfunum en hefur ekki enn fengið svör. Dómsmálaráðuneytið hefur því farið á svig við upplýsingalög.