Edda Falak er hætt störfum hjá Heimildinni en þetta staðfesti Þórður Snær Júlísson ritstjóri í samtali við Mannlíf nú í morgun.
„Já ég get bara staðfest það að hún hafi lokið störfum hjá okkur í síðustu viku. Við ætlum ekki að tjá okkur frekar um það,“ sagði Þórður. Það vakti athygli um helgina að Edda Falak var ekki lengur skráð sem blaðamaður á vefsíðu Heimildarinnar.
Þann 20.febrúar síðastliðinn kom fram í tilkynningu að Edda hefði hafið störf hjá Heimildinni og að þættir væru væntanlegir í mars undir nafninu Edda Falak. Rúmum mánuði síðar þann 24.mars, sendi Heimildin frá sér yfirlýsingu í kjölfar umfjöllunar Frosta Logasonar, þar sem Edda viðurkenndi að hafa ekki greint rétt frá stöðu sinni gagnvart fjármálafyrirtækjum í Danmörku þegar hún var búsett þar. Baðst hún afsökunar á missögninni. Ekki liggur fyrir hvort Edda hafi sagt starfi sínu lausu eða verið sagt upp störfum.