Sjálfboðaliðasamtökin Dýrfinna fékk rausnarlega gjöf frá eiganda tíkarinnar Tinnu sem fannst á lífi á dögunum eftir talsverða leit.
Rúnar Rúnarsson, eigandi tíkarinnar Tinnu lofaði 110.000 krónum í fundarlaun fyrir þann sem fyndi Tinnu á lífi. Kona nokkur fann hundinn en vildi ekki þiggja fundarlaunin. Rúnar ákvað því að gefa Dýrfinnu peninginn, sem þáði þá með þökkum.
Sandra Ósk Jóhannsdóttir, einn af sjálfboðaliðunum í Dýrfinnu, sagði frá þessu á Twitter.
„Við hjá Dýrfinnu fengum rausnarlegan styrk frá eigendum hennar Tinnu sem mun nýtast okkur vel í frekari tækjakaup. Næsta markmið hjá okkur er kaup á dróna með hitamyndavél til að hjálpa okkur enn frekar í leitum á týndum dýrum,“ skrifaði hún og bætti við: „Það var yndisleg erlend kona sem tók hana heim og vissi ekki hvað hún ætti að gera. Barnabarnið hennar hjálpaði henni í gærkvöldi að hafa uppi á eiganda. Hún afþakkaði fundarlaun og var Rúnar staðráðinn í að peningurinn ætti að fara á góðan stað. Hann ákvað þá að styrkja okkur.“
Þegar aðili nokkur lýsti yfir ánægju sinni með þetta allt svaraði Sandra Ósk: „Já það er góð tilhugsun að hún hafi verið í dekri í hlýjunni í staðinn fyrir ein í felum úti.“