Fimmtudagur 11. ágúst, 2022
8.8 C
Reykjavik

Ferðalangar gætu upplifað raskanir og ringulreið fram á haust: „Kemur illa niður á ferðaplönum“

Helgarviðtalið

- Auglýsing -

Orðrómur

- Auglýsing -

Ritstjóri Túrista varar við því að það ófremdarástand sem ríkt hefur á flugvöllum og í flugsamgöngum undanfarið muni líklega halda áfram fram á haustið. Hann mælir með því að ferðast eingöngu með handfarangur og að forðast tengiflug. Þetta kom fram í máli hans í Bítinu á Bylgjunni í morgun.

Talsvert hefur verið fjallað um tíðar tafir á flugum, týndan farangur, og öngþveiti og óreiðu á flugvöllum heimsins undanfarið. Fregnirnar berast frá Bretlandi og fleiri löndum í Evrópu, sem og Bandaríkjunum. Viðskiptavinir hinna ýmsu flugfélaga hafa lent í því að ferðaáætlanir þeirra komist í uppnám vegna þessa og eru íslensku flugfélögin engin undantekning. Greint hefur verið frá því að illa gangi að manna stöður hjá flugfélögum og á flugvöllunum eftir heimsfaraldur Covid-19. Viðsnúningur í ferðaþjónustu var hraður eftir að mörg lönd felldu úr gildi takmarkanir vegna faraldursins.

„Þetta er allavega alveg agalegt ástand og kemur illa niður á ferðaplönum mjög margra farþega bæði vestanhafs og í Evrópu. Það er svosem engin lausn í sjónmáli akkúrat núna yfir hásumarið þegar flestir eru á ferðinni,“ segir Kristján Sigurjónsson, eigandi Túrista, í Bítinu. Hann segir ástandið geta varað fram á haust, ef marka megi til að mynda yfirlýsingu forstjóra Lufthansa, sem er stærsta flugfélagasamsteypa í Evrópu.

„Hann gerir ekkert ráð fyrir að þetta skáni nokkuð fyrr en að líður á haustið þegar færri verða á ferðinni. Þá má búast við því að flugfarþegar verði áfram að sætta sig við breytingar á flugáætlunum og töfum,“ segir Kristján. Hann bendir farþegum á að sækja um bætur frá flugfélögunum ef flugi er seinkað um langan tíma eða aflýst.

Mannekla er þó ekki eina vandamál flugfélaganna. Verkföll hafa farið af stað hjá flugfélögum og á flugvöllum víða um Evrópu og röskun hefur orðið á aðfangakeðju.

Kristján mælir með því við ferðalanga að forðast tengiflug og einfalda ferðalagið eins og kostur er.

- Auglýsing -

„Það hefur verið töluvert um að farangur týnist. Gott er að ferðast bara með handfarangur og helst að fljúga bara beint og reyna að gera ferðalögin eins einföld og hægt er.“

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 

Lestu meira

- Auglýsing -

Veistu meira um málið?

Endilega láttu heyra frá þér!
Frjálst er að senda nafnlausa ábendingu en netfang þarf að vera útfyllt.
Fullum trúnaði er heitið.

Deila

Nýtt í dag

Mest lesið í vikunni

Í fréttum er þetta helst...

- Auglýsing -