„Sjálfsagt er að geta þess að í kvöld fengum við hjón þau tíðindi að við erum ekki með COVID-19 sjúkdóminn. Um leið vorum við minnt á þau sannindi að sú niðurstaða útiloki ekki að við fáum sjúkdóminn síðar. Við þurfum öll að vera á verði núna,“ segir Guðni Th. Jóhannesson forseti Íslands í pistli á Facebook-síðu sinni.
Guðni og eiginkona hans, Eliza Reid, fóru bæði í skimun hjá Íslenskri erfðagreiningu á föstudag. Segir Guðni að gott hafi verið að geta vakið athygli á „þessu frábæra framtaki sem hefur vakið athygli út fyrir landsteinana og má vel vera að niðurstöður skimunarinnar nýtist fleirum en okkur sjálfum á þessu landi.“
Segir Guðni að hann hafi fengið boð á fjölda viðburða þessa viku, sem ýmist hafi verið frestað eða þeim aflýst, og sendir hann þeim einstaklingum baráttukveðjur.
„Þrátt fyrir okkar erfiðu daga þurfum við að halda okkar striki eftir föngum – eða kannski einmitt vegna þess andstreymis sem mætir okkur núna, segir Guðni og sendir þeim sem smitast hafa af veirunni baráttukveðjur.
Minnir hann að lokum á að lífið heldur áfram, lóan sé komin, sem eru gleðitíðindi okkar í öllum veirufregnum. Nú sem aldrei fyrr sé útivist og hreyfing holl öllum sem tök hafa á að vera úti.