Lögreglan á höfuðborgarsvæðinu hafði í mörg horn að líta í nótt. Mikið var um ölvunartengd mál í miðbæ Reykjavíkur og ýmis atvik víða um höfuðborgarsvæðið.
Rétt eftir klukkan hálf fimm í nótt var bifreið stöðvuð við umferðareftirlit. Áður en lögregla gat gengið að bílnum hafði ökumaðurinn hinsvegar tekið á rás og lagt á flótta. Hann var þá á bak og burt. Lögreglu grunar að maðurinn hafi haft óhreint mjöl í pokahorninu og hafi þess vegna látið sig hverfa. Það vildi til að maðurinn missti síma sinn á flóttanum, sem skemmdist talsvert. Lögregla hefur hann undir höndum.
Í miðbænum var klukkan ekki orðin margt þegar fyrstu tilkynningar bárust lögreglu. Klukkan var rétt um hálf 9 þegar lögregla var kölluð til að veitingastað í miðbæ Reykjavíkur vegna manns sem var að berja á rúður á staðnum. Maðurinn lét sig hverfa þegar honum var vísað á brott af lögreglu og því var ekki þörf á frekara inngripi.
Tilkynnt var um líkamsárás á skemmtistað í miðbæ Reykjavíkur laust fyrir klukkan 4 í nótt. Ekki liggja fyrir frekari upplýsingar að svo stöddu. Önnur líkamsárás var tilkynnt í miðbænum rétt fyrir klukkan 1 í nótt en þegar lögreglu bar að garði hafði árásarmaðurinn hlaupið af vettvangi. Vitni voru þó á staðnum og er málið í rannsókn.
Í tvígang var tilkynnt um grunsamlegar mannaferðir í austurbæ Reykjavíkur í nótt. Íbúi sá grunsamlegan mann sniglast við húsið um klukkan korter fyrir 2 í nótt. Íbúinn ákvað sjálfur rannsaka málið og kanna hvað maðurinn vildi upp á dekk. Þegar sá síðarnefndi varð var við íbúann tók hann til fótanna og komst undan.
Í seinna skiptið var klukkan rétt að verða 4 í nótt. Þá var tilkynnt um mann á hvítum sendiferðabíl sem var að reyna að opna bifreiðar. Lögregla kannar málið.
Snemma í gærkvöld var tilkynnt um mann að stela úr hverfisverslun. Maðurinn fór af vettvangi í bifreið en lögregla hafði upp á og stöðvaði bifreiðina. Þjófurinn reyndist farþegi í henni en var ökumaður hennar grunaður um akstur undir áhrifum fíkniefna og akstur án ökuréttinda. Tekin var skýrsla vegna þjófnaðarins og ökumaður bifreiðarinnar fluttur á lögreglustöð í sýnatöku.
Rétt eftir klukkan 23 í gærkvöld var lögregla kölluð til á hverfisveitingastað á höfuðborgarsvæðinu vegna manns sem hafði í hótunum við annað fólk á veitingastaðnum. Þegar lögregla kom á staðinn varð það deginum ljósara að maðurinn var ofurölvi. Hann neitaði að yfirgefa staðinn og hafði bæði hótað og veist að gestum á veitingastaðnum. Sökum ástands mannsins reyndist ekki annað í stöðunni en að handtaka hann og vista í fangageymslu þar til ástand hans yrði þannig að hægt væri að taka af honum skýrslu.
Rétt eftir klukkan fjögur í nótt tilkynntu íbúar hverfis um menn á gangi, á stofnbraut í hverfinu. Tilkynnanda fannst rétt að láta lögreglu vita að um væri að ræða tvo menn sem væri „hasslykt“ af. Lögregla brást vasklega við hassmönnunum en þegar hún kom á svæðið voru þeir á bak og burt.