Töluvert var um foktjón á höfuðborgarsvæðinu í nótt. Þá tóku helst þakplötur og trampólín á loft og mátti slökkvilið höfuðborgarsvæðins sinna þó nokkrum útköllum.
Vind hefur tekið að lægja á höfuðborgarsvæðinu en hann bætir í á Suðaustur- og Austurlandi. Rauð veðurviðvörun tekur gildi á Austfjörðum á hádegi. Samkvæmt vef Veðurstofu Íslands er spáin fyrir Austurland svohljóðandi: „Norðvestan rok eða ofsaveður, 25-33 m/s með vindhviðum yfir 45 m/s, hvassast sunnantil. Miklar líkur á foktjóni og grjótfoki og fólk er hvatt til þess að tryggja lausamuni. Ekkert ferðaveður á meðan veðrið gengur yfir.“
Björgunarsveitir eru í viðbragðsstöðu.
Á vef Isavia kemur fram að öllu flugi til Austurlands hafi verið aflýst. Fólk, á Austurlandi, er hvatt til að halda sér heima.