Hópi farþega Diamond Princess skemmtiferðaskipsins hefur verið hleypt frá borði eftir að 3700 manns, áhöfn og farþegar, hefur verið haldið í sóttkví í skipinu frá 3. febrúar við strendur Japan.
Staðfest smit í skipinu eru að minnsta kosti 542. Smitaðir hafa þá verið fluttir á spítala á meðan sýni hafa verið tekin úr öðrum farþegum skipsins. Byrjað er að hleypa þeim farþegum út sem reyndust ekki smitaðir af COVID-19 kórónaveirunni.
Nú hafa um 500 manns forðað sér frá borði og fjölmiðlar hafa fylgst náið með fólki streyma út úr skipinu og koma sér í rútur eða leigubíla á höfninni í Yokohama í Japan.
Heilbrigðisyfirvöld í Japan segja að fólkið sem um ræðir fái nú að fara heim en að þau verði áfram undir eftirliti og haft verði samband við alla farþega innan nokkurra daga til að kanna líðan þess.
Farþegar skipsins koma frá rúmlega 50 löndum.
Sjá einnig: Ástandið um borð í Diamond Princess – Óvissa ríkir og farþegar að „klikkast“