Viðurkenning Verðlaunasjóðs iðnaðarins verður afhent á morgun miðvikudaginn 15. júní kl. 16.00 í Húsi atvinnulífsins í Borgartúni 35.
Í ár er það fjölskyldufyrirtækið Geislar Gautavík sem hlýtur viðurkenninguna, fyrir tilraunaræktun á iðnaðarhampi.
Samkvæmt fréttatilkynningu frá Verðlaunasjóðnum var „Verðlaunasjóður iðnaðarins stofnaður 1976 af Kristjáni Friðrikssyni og eiginkonu hans Oddnýju Ólafsdóttur. Tilefnið var meðal annars að þá voru liðin 35 ár frá stofnun Klæðagerðarinnar Últímu en einnig það að Kristján hafði óbilandi trú á íslenskum iðnaði og íslenskri hönnun. Honum fannst aldrei nógsamlega vakin athygli á hinum fjölmörgu íslensku uppfinningarmönnum. Stofnfé Verðlaunasjóðs iðnaðarins var húseign sem Últíma gaf og skyldi ágóðinn af eigninni verða verðlaunafé.“
Enn fremur kemur fram í fréttatilkynningunni hefur sjóðurinn verið starfræktur í anda stofnenda hans í samstarfi við Samtök iðnaðarins og hefur með vissu millibili veitt viðurkenningar, oftast fyrir frumkvöðlastarf á sviði iðnaðar. Samkvæmt upphaflegri stofnskrá sjóðsins er tilgangur hans að örva til dáða á sviði iðnaðar og jafnframt vekja athygli á þeim afrekum sem unnin hafa verið og unnin verða á því sviði.
Sjóðsstjórnina skipa Sigrún Kristjánsson, fulltrúi fjölskyldu Kristjáns, Árni Sigurjónsson, formaður Samtaka iðnaðarins, og Sigurður Hannesson, framkvæmdastjóri Samtaka iðnaðarins.