Hinsegin dagar hófust í gær og hefur borgin verið skreytt í öllum litum regnbogans. Vert í því að minna á dagskrá daganna en hápunktur hátíðarinnar er sem áður Gleðigangan.
Gleðigangan 2022 verður gengin laugardaginn 6. ágúst. Gangan leggur af stað frá Hallgrímskirkju klukkan 14:00. Gengið verður frá Hallgrímskirkju eftir Skólavörðustíg, Bankastræti, Lækjargötu, Fríkirkjuvegi og endað á Sóleyjargötu við Hljómskálagarðinn þar sem útitónleikar taka við.
Í Gleðigöngunni sameinast lesbíur, hommar, tví- og pankynhneigðir, trans fólk, intersex fólk og aðrir hinsegin einstaklingar ásamt fjölskyldum sínum og vinum til að staðfesta tilveru sína og minna á baráttumál sín. Gangan er í senn kröfuganga hinsegin fólks, sem kallar eftir jafnrétti, vitundarvakningu og útrýmingu mismununar, sem og vettvangur til að fagna því sem hefur unnist í baráttunni.
Á heimasíðunni hinsegindagar.is má finna ítarlegar upplýsingar um hátíðardagskránna.