„Gísli Marteinn kominn aftur á stjá og það gerist í sömu andrá og drottningin kveður og laufin fölna og falla og íslenskur veturinn þenur sig og minnir sumarjurtina á hvur að lokum hefur völdin, tögl og hagldir í þessu landi, og fuglarnir fljúga suður að sólu. En við höfum þó Mugison. Mikið ósköp er það sjarmerandi maður. Því einsog skáldið sagði forðum: Það vex eitt blóm fyrir vestan.“
Þetta skrifar Glúmur Baldvinsson á Facebook. Í ljósi þess að hann tengir Gísla við vetur og volæði þá mætti halda að Glúmur væri einn af fjölmörgum sem sjá rautt þegar Gísli birtist á skjánum. Svo er ekki, því Glúmur segist helsti aðdáandi þáttstjórnandans.
Í athugasemd við eigin færslu skrifar Glúmur: „Ég vil taka fram að með þessum orðum vil ég ekki gera lítið úr Gísla. Hann er bara yndislegur einsog hann er og djúpt undir niðri elskar þjóðin hann dáldið. Alla vega elskar hún að þola hann ekki. Eða hávær meirihluti. Gísli er fínn. Ég er hans helsti aðdáandi.“