Guðmundur Ingi Guðbrandssonu, umhverfis- og auðlindaráðherra, er kominn í sóttkví eftir að samstarfskona hans í ráðuneytinu greindist með COVID-19. Hann segir frá þessu á Facebook. Smitrakningarteymi hafði samband við Guðmund í gær.
Hann segist ekki hafa fundið fyrir neinum einkennum og segir líðan sína góða. Núna er hann að aðlaga sig nýjum aðstæðum og mun vinna að heiman.
„Hugur manns þessa dagana er auðvitað hjá þeim sem eru veik og hjá öllu heilbrigðisstarfsfólkinu okkar, kennurum, almannavörnum og öðrum sem halda grunnþjónustunni gangandi. Ég tek hatt minn ofan fyrir ykkur öllum,“ skrifar Guðmundur.
Hann segir frá nýju markmiði sem hann hefur sett sér. „Ég ætla að hringja í a.m.k. einn vin á dag til að heyra í þeim hljóðið. Við komumst í gegnum þetta saman.“