Hildur Lillendahl kom fram í hlaðvarpsþætti Karlmennskunnar, en hún er ekki þekkt fyrir að sitja á sínum skoðunum.
Hlaðvarpsþátturinn hefur einblínt á karla og karlmennsku í femínísku ljósi.
Hildur telur að ekki hafi verið brugðist við í kjölfar metoo byltingarinnar og vandamálið tekið föstum tökum:
„Ég er búin að vera láta það fara í taugarnar á mér undanfarið að þegar koma upp hreyfingar, eins og metoo, þar sem vella upp sögur úr öllum mögulegum geirum að þá skuli ríkisvaldið og hið opinbera ekki bregðast við með því að taka vandamálið föstum tökum og veita gríðarlegu fjármagni í málaflokkinn og gera eitthvað. Heldur eru skrifuð minnisblöð, skerpt á stefnum og sendur tölvupóstur þar sem er minnt á áætlun gegn áreitni: „Það er bannað að áreita hérna, bara minna á það.“ Í mesta lagi er haldið málþing.
Risa stórt, settar fjórar milljónir í að leigja Hörpu eða eitthvað en concrete aðgerðirnar eru engar. Af hverju var ekki stofnað saksóknaraembætti í tengslum við metoo eða sett í gang almennileg rannsókn? Mig langar að ríkið ákveði að veita almennilegum peningum í baráttuna gegn kynbundnu ofbeldi.“ segir Hildur Lilliendahl í 68. hlaðvarpsþætti Karlmennskunnar.
Þorsteinn V. Einarsson sér um hlaðvarpsþættina Karlmennskan, en hann er með meistaragráðu í kynjafræði frá Háskóla Íslands og starfaði lengi sem forstöðumaður og deildarstjóri félagsmiðstöðva í Reykjavík.
Hér má hlusta á þáttinn í heild sinni.