Höskuldur Kári Schram, fréttamaður á RÚV, segist hafa snarlega hætt við viðskiptin þegar hann ætlaði sér að taka út pening í hraðbanka í miðborg Reykjavíkur. Þegar hann varð var við hin himinháu gjöld sem bankinn ætlaði að taka sér fyrir þjónustuna blöskraði fréttamanninum.
Höskuldur Kári lýsir upplifun sinn í færslu á Facebook. Þar segir hann:
„Ætlaði að taka þúsund kall út úr hraðbanka í miðborginni. Var rukkaður um 300 krónur í “þjónustugjöld” vegna þess að þetta er ekki minn viðskiptabanki. Hætti snarlega við. En er þetta eðlileg verðlagning? 30 prósent fyrir að taka út einn þúsundkall!,“ segir Höskuldur.
„Sjúkt“ segja einhverjir þeirra sem tjá sig undir færsluna og lýsa sumir yfir undrun sinni vegna hárra þjónustugjalda bankans. Á sama tíma benda aðrir á að þjónustugjaldið sé föst upphæð, óháð þeirri upphæð sem tekin er út.