Huldumenn með kylfur, ofurölvi berserkir og slagsmál. Þetta er meðal þess sem lögreglan á höfuðborgarsvæðinu þurfti að fást við í gærkvöld og nótt.
Það er af sem áður var þegar föstudagurinn langi var bæði lengsti og leiðinlegasti dagur ársins, í augum margra að minnsta kosti. Núorðið – reyndar ekki síðustu tvö ár, af augljósum ástæðum – eru meira að segja skemmistaðir opnir fram á rauðanótt. Það leyndi sér ekki við skoðun dagbókar lögreglunnar á höfuðborgarsvæðinu í morgunsárið.
Í miðborg Reykjavíkur var nokkuð um slagsmál og ólæti, sem lögregla sinnti ásamt öðrum málum sem töldust minniháttar. Það er augljóslega ekki lengur bannað að skemmta sér á föstudaginn langa – þótt það megi vissulega deila um skemmtanagildi ofurölvunar og slagsmála.
Um miðnætti í gærkvöldi var tilkynnt um tvo dularfulla menn á gangi með kylfur. Lögregla mætti á svæðið og leitaði að mönnunum, án árangurs. Aðeins ein tilkynning barst um mennina þetta kvöld.
Um svipað leyti, upp úr klukkan hálf 12, höfðu starfsmenn hótels miðsvæðis í Reykjavík kallað á lögreglu vegna ofurölvi manns sem neitaði að greiða fyrir vín sem hann var þó sannarlega búinn að drekka. Ekki reyndist unnt að leysa málið farsællega og svo fór að lögregla fjarlægði manninn af staðnum og hann var látinn gista fangageymslur.
Um klukkan 1 í nótt varð umferðaróhapp í vesturbæ Reykjavíkur. Annar bíllinn reyndist óökufær eftir áreksturinn en engin slys urðu þó á fólki.
Laust fyrir klukkan hálf 2 í nótt var lögregla kölluð til vegna manns sem hafði ekið á bíla í miðborginni. Maðurinn reyndist ölvaður og var handtekinn á vettvangi. Samkvæmt tilkynningu frá lögreglu er málið í rannsókn, en minniháttar tjón varð á bílum.
Umferðaróhapp varð á Reykjanesbraut eftir miðnætti. Engin slys urðu þó á fólki.