Í góðum málum
Þjóðhátíð var haldin í Vestmannaeyjum, í fyrsta sinn síðan 2019, nú um verslunarmannahelgina. Má því með sanni segja að Eyjapeyjar, -meyjar og gestir þeirra séu í góðum málum. Hátíðin fór að mestu leyti mjög vel fram og er það mál manna að langt sé síðan hún heppnaðist svona vel. Gæslan var öflug á svæðinu enda ekki vanþörf á þegar yfir 10.000 manns mæta á frekar lítið svæði og margir með áfengi við hönd. Veðrið var hið ágætasta og heppnuðust skemmtiatriðin afar vel og fundu flestir gestir, af öllum kynjum og öllum aldri, eitthvað við sitt hæfi á eyjunni fögru. Erlendir ferðalangar komust í fréttirnar þegar þeir mættu algjörlega glærir í Herjólfsdal í upphafi hátíðarinnar og vissu ekki hvaðan á þá stóð veðrið. Þeir höfðu ætlað að hafa það rólegt í Vestmannaeyjum þessa helgina eftir að hafa verið á stórri útihátíð erlendis. Slíkar fréttir eru alltaf fyndnar og því tilvalið að leyfa henni að fylgja með.
Í slæmum málum
Grindvíkingar og nærsveitungar eru í frekar slæmum málum eða voru það að minnsta kosti er þetta var ritað. Undanfarið hefur jörð skolfið af slíku offorsi að hlutir hafa hrunið úr hillum og loftplötur fallið úr verslunarmiðstöðvum. Já, eða einni réttara sagt. Hver stórskjálftinn á fætur öðrum hefur skekið Grindavík og nágrenni og hafa hinir mestu harðjaxlar fengið sting fyrir hjartað enda skjálftarnir á köflum stærri og lengri en í venjulegu skjálftaárferði. Þá hafa höfuðborgarbúar keppst við að segja frá því á Facebook að þeir hafi fundið fyrir þessum og hinum skjálfta, sem gleður alltaf vini þeirra og verður aldrei þreytt. Minna skjálftarnir á undanfara eldgossins í Geldingadölum, en rödd skynseminnar, Magnús Tumi Guðmundsson, jarðfræðingur og prófessor, hefur sagt af sinni alkunnu rósemd, að annaðhvort gjósi eða ekki. Svona sirka. Auðvitað er það rétt hjá honum, enda má segja þetta um flest ef ekki allt í lífinu, annaðhvort gerist það eða ekki.
Sjá má blaðið í heild sinni hér.