Íbúar Blönduóss sameinuðust á íþróttavelli bæjarins í gærkveldi í fallegri samverustund og kveiktu á friðarkertum. Með samkomunni vildu þeir sýna samhug og hluttekningu til þeirra sem ættu um sárt að binda. Umhverfis íþróttavöllinn hafði verið komið fyrir kertum sem mynduðu hring utan um hjarta.
Ljósdýrðin verður að kallast í meira lagi táknræn og skýrt merki um sýnda samstöðu til þeirra sem eiga um sárt að binda.
Íbúi bæjarins sagði samkomuna vel sótta og að sorgin hafi verið ríkjandi. „Mikil samkennd og kærleikur var meðal íbúanna á samkomunni. Það hefur alltaf verið mikil samheldni á meðal bæjarbúa.“
Mannlíf sendir bæjarbúum og aðstandendum innilegar samúðarkveðjur.