Jón Gnarr er eins og flestir hljóta að vera sammála um, einn allra fyndnasti maður Íslands, þó víða væri leitað. Hann er duglegur að nota Twitter en þar birtir hann alls kyns pælingar og hugmyndir sem fljúga um í kollinum á honum. Og nú er hann kominn með veðurspá fyrir næsta árið.
Spá Jóns er nokkuð trúverðug enda nokkuð víð og byggð á reynslu, frekar en yfirskilvitlegra hæfileika grínistans til að sjá fram í tímann.
„ég spái því að þetta rok verði algengara næstu mánuði. það mun kólna töluvert og í kringum áramótin mun rigna og jafnvel snjóa víða. frosthörkur framí mars og apríl sem verða kaldir mánuðir en vætusamir. í maí verður svikavor í nokkra daga. júní verður vætusamur en júlí ágætur. ég spái því að ágúst verði ágætur, stillt veður en kalt, sérstaklega seinni part dags og á kvöldin.“
Viðbrögðin við færslunni eru góð en rithöfundurinn Andri Snær Magnason er meðal þeirra sem skrifa athugasemd við spánna. „og mikilvægt að þegar svokallaðir „veðurfræðingar“ spá einhverju á næstu misserum að þín skoðun á veðrinu fái jafn mikið pláss.“
Bjarki Steinn svarar Jóni með góðu gríni: „Mjög gott að fá þessar upplýsingar svona snemma. Veðurfræðingar eru oft að liggja á þessum upplýsingum eins og ormar á gulli og gefa manni í mesta lagi viku fyrirvara. Ég mun setja sumarhúsgögnin inn nú, nagladekk rétt fyrir áramót og verð erlendis maí – júní. Takk takk!“
Atli Viðar skrifar stutta en hnitmiðaða athugasemd: „Nostradammgnarr.“
Davíð Már kom svo með þarfa spurningu til spámannsins: „Verður páskahret?“
Jón hefur ekki enn svarað þeirri spurningu.
ég spái því að þetta rok verði algengara næstu mánuði. það mun kólna töluvert og í kringum áramótin mun rigna og jafnvel snjóa víða. frosthörkur framí mars og apríl sem verða kaldir mánuðir en vætusamir. í maí verður svikavor í nokkra daga. júní verður vætusamur en júlí ágætur
— Jon Gnarr (@Jon_Gnarr) October 16, 2022