Séra Jón Ármann Gíslason, sóknarprestur á Skinnastað, biður netverja um að hjálpa íslenskri fjölskyldu sem á um sárt að binda í Svíþjóð. Sonurinn slasaðist illa í bruna og er mikið slasaður að sögn prestsins.
Pilturinn, Sigurgeir Sankla Ísaksson, er nú á sérhæfðri deild í Svíþjóð ásamt foreldrum sínum. Foreldrar hans, Ísak Sigurgeirsson og Senee Sankla, starfrækja verslunina Ásbyrgi en þurfa loka næstu vikurnar til að hlúa að Sigurgeiri.
„Hann er mikið slasaður, og brunasárin þekja því miður stóran hluta líkama hans. Þakka má skjót viðbrögð réttra aðila, sem komu drengnum undir læknishendur eins fljótt og verða mátti. Munum að margt smátt gerir eitt stórt. Umfram allt er það von okkar og bæn, að Sigurgeir megi ná heilsu og kröftum á ný,“ segir Jón.
Fjölskyldan rekur verslunina Ásbyrgi, en málinu fylgir eðlilega mikið tekjutap. „Þeim rekstri, sem þau byggja lífsafkomu sína á, geta þau eðlilega ekki sinnt með hefðbundnum hætti næstu vikur og mánuði. Þess vegna vil ég að höfðu samráði við vini og velunnara fjölskyldunnar minna á styrktarreikning prestakallsins.“
Þú getur hjálpað fjölskyldunni með því að leggja inn á eftirfarandi reikning prestakallsins:
Kennitala: 590269-6119
Banki: 0192-26-30411