Íslenski náttúruverndarsjóðurinn, auk NASF, landeigendur og íbúar á Vestfjörðum hafa nú kært útgáfu MAST á rekstrarleyfi handa Arnarlaxi fyr sjókvíelda á laxi í Ísafjarðardjúpi.
„Við hjá Íslenska náttúruverndarsjóðnum höfum ásamt NASF, landeigendum og íbúum á Vestfjörðum kært til úrskurðarnefndar umhverfis- og auðlindamála útgáfu Matvælastofnunar (MAST) á rekstrarleyfi handa Arnarlaxi fyrir sjókvíaeldi á laxi í utanverðu Ísafjarðardjúpi, út af Drangsvík, Eyjahlíð og Óshlíð.“ Þannig byrjar tilkynning frá Íslenska náttúruverndarsjóðnum sem birti var á Facebook í gær.
Í tilkynningunni kemur fram að ábúandi á eyjunni Vigur sé einn þeirra sem kæra MAST:
„Meðal kærenda er ábúandi á eyjunni Vigur. Fjölskylda hans býr í Vigur allt árið og byggir lífsviðurværi sitt á náttúrugæðum og dýralífi eyjunnar. Stærsta fjárhagslega stoð fjölskyldunnar er ferðaþjónusta en í Vigur kemur fjöldi ferðamanna ár hvert til að upplifa óspillta náttúru. „Eðli máls samkvæmt kemur allt fólk siglandi til Vigur og því er siglingaröryggi grundvallarforsenda lífs kæranda og fjölskyldu hans,“ eins og segir í kærunni.“
Segir enn fremur í tilkynningunni að rekstrarleyfi MAST hafi verið gefið út í síðasta mánuði þrátt fyrir að Samgöngustofa hafi komist að því mati að vegna siglingaöryggis sé óheimilt að veita leyfi á tveimur eldissvæðanna.
„Full ástæða er til að velta fyrir sér persónulegri ábyrgð starfsmanna MAST, sem tóku þessa ákvörðun og skrifa undir leyfið, ef slys verða vegna staðsetninga sjókvíanna á siglingaleiðum þar sem Samgöngustofa segir að þær megi ekki vera.Stofnanir hafa ekki sjálfstæðan vilja. Það er fólk sem stýrir þeim og hlýtur að þurfa að bera ábyrgð á afleiðingum verka sinna.“
Athugasemdir