Óskað var eftir aðstoð lögreglu klukkan átta í gærkvöldi vegna manns á íþróttakappleik. Maðurinn hafði látið illa, beitt áhorfanda ofbeldi og hótað honum. Þegar lögregla kom á vettvang reyndi maðurinn að flýja undan afskiptunum og óhlýðnaðist ítrekað fyrirmælum lögreglu. Að lokum var maðurinn, sem var í annarlegu ástandi, handtekinn og vistaður í fangageymslu.
Í miðbæ Reykjavíkur gerði lögregla húsleit klukkan korter í tíu í gærkvöldi. Við leitina fannst töluvert magn marijuana, sem var haldlagt. Í hverfi 108 og 105 var óskað eftir aðstoð lögreglu vegna líkamsárása skömmu eftir miðnætti en ekki kemur fram í dagbók lögreglu hvort einhver hafi slasast alvarlega.
Í Hafnarfirði kom lögregla auga á stolna bifreið og gaf því ökumanni merki um að stöða akstur. Ökumaður óhlýðnaðist fyrirmælunum og jók hraðann töluvert en þannig upphófst eftirför sem endaði með því að bifreiðinni var ekið fram af bílastæði sem var um 1-2 metra fall. Ökumaður og farþegi hlupu þá í burtu en athugull vegfarandi gat bent lögreglu á felustað þeirra. Mennirnir voru handteknir og vistaðir í fangageymslu en lögregla hefur ítrekað haft afskipti af ökumanninum.