Karlmaður á sjötugsaldri er krafinn um samtals 11 milljónir í miskabætur vegna kynferðisbrota gegn tíu ólögráða stúlkum, sem hann hefur verið ákærður fyrir. Var ákæran þingfest í Héraðsdómi Reykjavíkur í morgun.
Samkvæmt Rúv hefur maðurinn setið í gæsluvarðhaldi frá því í byrjun desember. Eru ákærurnar á hendur honum orðnar tvær en í fyrri ákærunni er hann sakaður um að hafa brotið gegn sjö ungum stúlkum. Fara forráðamenn þeirra fram á rúmar 8 milljónir í miskabætur.
Fram kemur í ákærunni sem þingfest var í morgun, að maðurinn hafi meðal annars sent sumum stúlknanna ljósmynd af getnaðarlim sínum og viðhaft klámfengið tal. Einnig er hann ákærður fyrir tilraun til þess að hitta tvær stúlkur í kynferðislegum tilgangi.
Rannsókn lögreglu á málinu var afar yfirgripsmikil en meira en 30 börn gáfu skýrslu, ýmist sem þolendur eða vitni og um það bil 20 fullorðnir.