Kvennaathvarfið stefnir að því að hefja byggingu fjölbýlishúss sem ætlað er skjólstæðingum athvarfsins næsta föstudag, 14. febrúar, á sjálfan Valentínusardag.
Sigþrúður Guðmundsdóttir framkvæmdastýra Kvennaathvarfsins segir í viðtali við Stundina að það sé kannski á einhvern hátt viðeigandi að hefja byggingu hússins þann dag.
Húsinu hefur verið valinn staður nálægt lögreglustöð og hefur verið rætt sérstaklega við lögregluna um að veita konunum aukna vernd. Húsið verður miðsvæðis, í nálægð við Kvennaathvarfið sjálft, nálægt skóla, almenningssamgöngum og þjónustu.
Átján litlar íbúðir verða í húsinu, þar af ein sem sérstaklega er útbúin fyrir konur í hjólastólum. Konum sem dvalið hafa í Kvennaathvarfinu mun bjóðast að leigja þær á viðráðanlegu verði á meðan þær koma undir sig fótunum.
„Þegar þær flytja inn verður gerður samningur við þær um það hvernig þær nýta þetta færi sem þær hafa á meðan þær leigja þar, til að byggja sig upp. Við erum bjartsýnar á að konurnar geti fundið sér vinnu, jafnvel lokið námi, á meðan þær eru þarna í skjóli,“ segir Sigþrúður og bætir við að starfskonur Kvennaathvarfsins muni sinni stuðningi og eftirfylgni við konurnar sem þarna muni búa.
Byggingartími er áætlaður sextán mánuðir og stefnt að því að fyrstu konurnar geti flutt inn síðsumars árið 2021.