„Ég er vanur svona djöflagangi,“ segir Benedikt Sveinsson, faðir Bjarna Benediktssonar fjármálaráðherra, aðspurður hvort hann sjái eftir kaupunum á hlut í Íslandsbanka.
Í dag sagði Rúv frá því að Umboðsmaður Alþingis hafi sent Bjarna Benediktssyni fjármálaráðherra fyrirspurn um sölu Íslandsbanka en sérstaklega spurði hann um hæfi hans hvað varðar sölu á hlut ríkisins til félags í eigu föður hans. Bjarni sagði sjálfsagt að svara spurningum umboðsmannsins.
Í fyrra sagðist Bjarni hafa beðið sitt nánasta fólk að taka ekki þátt í kaupum á hlutum í Íslandsbanka og að það hefði ekki hvarflað að honum að faðir hans myndi samt sem áður einmitt gera það.
Mannlíf heyrði í föður fjármálaráðherra og spurði hvort hann sæi eftir því að hafa keypt hlutinn í Íslandsbanka. „Af hverju ætti ég að gera það?“ spurði Benedikt til baka en þegar blaðamaður benti á öll lætin sem kaupin ollu í samfélaginu svaraði Benedikt: „Já ég kippi mér bara ekkert upp við þetta. Ég er vanur svona djöflagangi.“