Í vikunni greindu fjölmiðlar frá því að íslenskir karlar væru farnir að raka af sér skeggið til að fyrirbyggja kórónasmit. Rætt var við lækni sem hefur rakað af sér skeggið í þágu sóttvarna og segist vita um minnst tvo aðra lækna sem gert það líka.
Sjá einnig: Hvetja menn til að raka af sér skeggið til að fyrirbyggja kórónasmit
Aðgerðir læknanna eru ekki úr lausu lofti gripnar því Bandaríska sóttvarnaeftirlitið hafði áður lýst yfir áhyggjum af skeggvexti heilbrigðisstarfsfólks. Það vakti athygli á því að grímur heilbrigðisstarfsmanna verði að hylja að minnsta kosti nef og munn til að forðast dropasmit frá veiku fólki. Mikilvægt sé að hárvöxtur í andliti nái ekki inn á það svæði sem innsiglar grímuna við andlitið. Sóttvarneftirlitið hefur þ.a.l. sett sig upp á móti skeggvexti.
Í kjölfar þeirrar umræðu hafa leiðbeiningar um rakstur sem sóttvarnaeftirlitið bandaríska hafði sent frá sér farið eins og eldur um sinu á Netinu og margir deilt þeim á samfélagsmiðlum í þeirri trú að leiðbeiningarnar dragi úr líkum á veirusmiti. Um er að ræða mynd þar sem sýndar eru 36 útfærslur af skeggi sem þykja uppfylla þau fyrrnefndu skilyrði að ná ekki inn á svæðið sem innsiglar grímurnar við andlitið.
Síðustu daga hafa fjölmiðlar hins vegar vakið athygli á því að leiðbeiningarnar eru þriggja ára gamlar og stílaðar á bandaríska heilbrigðisstarfmenn sem kjósi að skarta skeggi. Með öðrum orðum tengjast leiðbeiningarnar kórónuveirunni ekki á nokkurn skapaðan hátt.