Leikmaður í kvennaliði Fylkis var greind með COVID-19 kórónuveiruna í dag, eins og kom fram í kvöldfréttum RÚV og á 433.is.
Allt kvennalið Fylkis er nú farið í sóttkví vegna málsins og smitrakning er í gangi. Fylkir átti leik á móti Þrótti á þriðjudag og var umræddur leikmaður í hópi liðsins þann dag.
Konan var gestur í útskriftarveislu fyrir rúmri viku, en fjögur smit hafa greinst hjá gestum í veislunni. Leikmenn úr nær öllum liðum Pepsi-Max deildar kvenna voru í veislunni.
Fyrst greindist leikmaður í kvennaliði Breiðabliks nú í miðri vikunni, en sú hafði farið í sýnatöku á Keflavíkurflugvelli og var greind neikvæð þá. Kvennalið Breiðabliks og KR fóru í tveggja vikna sóttkví í kjölfarið.
Leikmaður í meistaraflokki karla hjá Stjörnunni greindist með smit á föstudag, en hann var í sömu veislu. Karlalið Stjörnunnar er í sóttkví eftir smitið.
Fjórða smitið sem greinst hefur tengt útskriftarveislunni, er hjá starfsmanni atvinnuvega- og nýsköpunarráðuneytisins.
Einnig eru leikmenn í HK og fleiri liðum í sóttkví eftir að hafa átt samskipti við smitaðan einstakling.
Smitið tengist sömu útskriftarveislu og hin tvö smitin sem hafa greinst meðal knattspyrnufólks á undanförnum dögum en leikmenn úr nær öllum liðum Pepsi-Max deildar kvenna voru í veislunni.