Leit Lögreglunnar á höfuðborgarsvæðinu að Stefáni Arnari Gunnarssyni, 44 ára, hefur enn engan árangur borið en hún heldur áfram í dag eftir að hlé var tekið um helgina.
Hlé var gert á leitinni á laugardaginn en henni verður haldið áfram í dag. Leitarhópar hafa leitað á og við Álftanes og hefur fjölmenni tekið þátt í leitinni, en Lögreglan á höfuðborgarsvæðinu hefur notið aðstoðar sérsveitar ríkislögreglustjóra, Slökkviliðs höfuðborgarsvæðisins, Landhelgisgæslunnar og björgunarsveitarmanna. Leitin hefur verið mjög umfangsmikil, en meðal annars hefur verið notast við þyrlu, dróna, báta og kafara.
Stefán Arnar er búsettur á Arnarhrauni í Hafnarfirði, en síðast er vitað um ferðir hans síðdegis á fimmtudaginn.