Fegurðardrottningin Linda Pétursdóttir, fyrrum Ungfrú heimur, er sökuð um fitufordóma í tengslum við nýja markaðsherferð hennar sem tröllríður nú samfélagsmiðlum. Um kostaða herferð er að ræða þar sem Linda Pé hefur hannað prógramm til að styrkja sjálfsmynd kvenna og hjálpa þeim þannig að bæta líf sitt.
Í skilaboðum Lindu má lesa að það sé ekki fyrr en aukakílóin eru horfin sem sjálfsmynd kvenna verður sterk. Linda spyr einfaldlega:
„Hvernig myndi þér líða ef sjálfsmynd þín væri sterk, aukakílóin væru horfin og þú værir að lifa draumalífinu þínu?“
Inga nokkur deilir færslunni á Twitter þar sem hún er með sín eigin skilaboð til fegurðardrottningarinnar. „Kæra Linda, ég er með sterka sjálfsmynd og lifi draumalífinu mínu þrátt fyrir „aukakíló“. Hneykslanlegt, ég veit. Hættu svo að troða þér inn í feedið mitt með auglýsingum takk,“ segir Inga. Og Heiða virðist vera svipað hissa: „Vá erum við ennþá bara þarna?,“ spyr hún.